Diskurso di Aña Nobo 

di

Señora Gobernador L.A. George-Wout

3 di yanüari 2018

Dama- i kabayeronan, bon nochi,

Ta un bunita tradishon ku riba un di e promé dianan di un aña nobo nos ta bini huntu den hardin di palasio pa deseá otro bon aña i prosperidat pa e aña nos dilanti. E binimentu huntu akí ta enfatisá nos solidaridat i ta ofresé nos un bon oportunidat pa interkambiá idea tokante e susesonan di e aña tras di lomba i mira padilanti riba loke eventualmente ta na kaminda pa nos. Un aña nobo ta karga tambe propósitonan ambisioso. Ta asina ku abo ku mi ta bai hasi nos máksimo esfuerso, awor muchu mas ku den pasado… n’ t’asina? ?. Ta mi sinsero deseo pa tur boso bon propósitonan bira realidat den 2018. 

Den sierto sentido 2017 tabata un aña di emoshon i literalmente un aña turbulento. Bon mirá, ta un aña ku tin bia ta trese serka mi sintimentu miksto. Na promé lugá konsekuensianan di e desaster di naturalesa ku fuertemente a afektá nos famia- i amigunan na Sint-Maarten, Saba i Sint Eustatius. E imágennan desastroso di e kasnan i e konfushon total di grupo grandi di hende ayariba, a laga profundo impreshon serka nos tur. Impreshonante ta por sierto e elastisidat di e hendenan na Islariba. Djis algun dia despues di e kalamidat hendenan a kuminsá duna tur ku tin di nan parti pa nan bolbe bini riba pia. Ta drechando e kaya- ku e kamindanan pa hende por trafiká atrobe, ta drechando e kasnan i pokopoko pakus- ku tiendanan ta kuminsá habri pa públiko atrobe. Mi tin gran atmirashon pa e posishon akí i mi ta konvensí ku pueblo di Islariba lo sali mas fuerte for di e eksperensia akí! Impreshonante ta ademas e yudansa ku a brinda i ku te ainda ta brindando e hendenan akí den nesesidat. Na Sehos a akohé pashèntnan for di Sint Maarten i muchanan di kua nan skolnan a keda totalmente destruí, por a sigui bai skol aki serka nos. Anto no ta na Kòrsou so tabata asina. E solidaridat tangibel i visibel akí tabata fuertemente presente na tur parti di Reino. 

Tin algun hende ku tin bia ta duda den e balor agregá di nos Reino, pero na momentonan asina mi ta sinti mi orguyoso ku nos ta forma huntu ún Reino! 

Den sentido polítiko i atministrativo tambe tabatin momentonan turbulento tantu na Kòrsou komo na e otro partinan di Reino. Despues di elekshon di òktober 2016 nos órden públiko tabata seriamente na prueba. Sinembargo, mi no a soña ni pensa ni un momentu so ku lo tabata nesesario solisitá e funshon di garantia di Reino, pasobra - komo konsekuensia di e relashonnan polítiko - lo no por a garantisá ku elekshon di aprel 2017 lo a tuma lugá na debido òrdu. 

Ta sumamente evidente ku no por bisa ku kos a kana di un forma atraktivo, pero afortunadamente tambe tin aspekto positivo den e historia akí. T’asina ku nos ta realisá ku semper tin un outoridat superior ku ta huzga nos manera di prosedé. Pa esei un kompas moral ta di importansia. Den e kuadro ei semper mi ta atmirá kon den tempu difísil hende ta lanta, superá nan mes i hasi loke ta korekto. Afortunadamente ta hopi hende a hasi asina, pero un di e hendenan ku ta meresé menshon spesial ta señor Kenneth Valpoort. El a organisá í guia un demonstrashon pasífiko ku e meta pa por a laga elekshon tuma lugá. E forma ku el a hasi esaki i defendé nos demokrasia i nos órden hurídiko, tabata ekstraordinario. El a sa di mobilisá ku e demonstrashon akí un ferviente deseo di pueblo. Mi ta spera sinseramente ku e asuntu ei finalmente a siña nos, tur e lèsnan importante riba e tereno di estado di derecho i demokrasia. En todo kaso e asuntu a resultá den un parlamento nobo, skohé demokrátikamente ku ta ekspresá huisio i deseo di votadónan. 

Dama- i kabayeronan,

Entretantu nos tin un gabinete nobo ku fo’i ora e miembronan a sinta, nan a haña nan konfrontá ku retonan kompletamente individual. Ta retonan grandi i inkontabel ku nos ta haña nos konfrontá kuné. I ora mi bisa ‘nos’, mi ke men polítikonan, mandatarionan i outoridatnan. Ta nos tin di tuma e kontròl pa impulsá ekonomia, pa stòp delinkuensia, pa promové e koheshon sosial entre siudadanonan, pa proporshoná bon kuido i edukashon adekuá i por ehèmpel pèrkurá pa un klima di invershon ku ta inspirá konfiansa. Proyektonan importante i urgente pendiente pa start òf ku ya ta den progreso ta pidi un guia adekuado, un enfoke desisivo i un kooperashon efikas. 

E megapir nobo por sirbi di ehèmpel. Despues ku finalmente hunta direktiva a tuma desishon pa konstruí e pir, realisashon di e obra akí a tuma lugá di un forma enérgiko i adekuadamente, loke a duna un resultado fantástiko! Ku e mes diligensia mester atendé proyektonan manera e refineria i e hòspital nobo. Un pronto finalisashon di e proyektonan akí ta brinda un base pa prosperidat ekonómiko i sosial, di moda ku tur siudadano di Kòrsou por kompartí progreso den nos pais. 

Ke men trabou tin na kantidat i ta kuestion di fronta e reto akí na 2018 ku entusiasmo. Mi tin sigur di por konta ku aporte di henter pueblo di Kòrsou. Huntu nos ta djòin e lucha pa realisá nos metanan. E metanan ei mester ta ambisioso, sin ku nos ta pèrdè realidat fo’i bista. Mi tin tur konfiansa ku nos lo tin éksito den nos plannan i ku 2018 ta bai ta un aña magnífiko pa nos presioso isla. 

Ta mi plaser bati glas ku boso. Tambe na nòmber di mi esposo Herman mi ta deseá abo ku bo famia un aña nobo felis, salú i próspero!

Salú! Gelukkig Nieuwjaar! Feliz año nuevo! Bonne année! Feliz Ano Novo! Bon añaaa!