DISKURSO DI GOBERNADOR DI KÒRSOU

SEÑORA LUCILLE-GEORGE WOUT

PARTIMENTU NA GRANDI DI KONDEKORASHON

26 di aprel 2018

Bon dia tur hende presente i kondekoradonan en partikular,

Awe ta un dia spesial. Un dia ku nos ta duna atenshon na tur e hendenan ku boluntariamente i ku dedikashon total ta traha den nos komunidat. P’esei ta un honor pa na nòmber di Su Mahestat Rei Willem Alexander otorgá na algun di boso un distinshon real. Na tur, 11 persona lo risibí un kondekorashon.

Un kondekorashon tin di kana henter un proseso promé ku e kondekoradonan ku ta mi dilanti akí por risibí nan medaya. Den e proseso ta konsiderá no solamente kon largu un hende a duna su aporte na komunidat, i ainda ta dunando esei, sino tambe den ki medida i di ki forma su aporte ta benefisiá henter komunidat. Ta hopi hende tin..., manera hendenan den boso ambiente mes, e komishon di kondekoradonan, gobièrnu i ‘Kapítulo’, ku tras di kortina ta envolví pa hasi tur esaki posibel. Tur ta hendenan ku ta haña ku ta balapena pone boso awe den foko pa boso méritonan. Efektivamente, pasobra boso tur meresé.

Komo komunidat nos mester yuda otro. Sigur den kaso kaminda otronan no por yuda nan kurpa. Boso ta hasi esaki diariamente. Ta un dedikashon ku nos komunidat no por biba sin dje i boso ta traha sin bati pechu, broma. Pero e hendenan rònt di boso sí a ripará kon boso ta traha i nan ta elogiá boso pa e dedikashon ei. Su Mahestat nos Rei, i ami tambe ta elogiá boso pa boso trabou balioso!

Mi ta komprendé ku e dedikashon ku alma i kurason ei no ta pa risibí apresio. Sinembargo no por keda sin menshoná loke boso ta hasi. Algun di boso ta dediká na desaroyo di hubentut via deporte, loke a proba di ta un aktividat ku efektivamente ta kontribuí na desaroyo di hubentut. Pero no ta deporte so. Algun di boso a mustra ku ofresiendo posibilidat edukativo na mayor- i ousiliantenan, esaki ta aportá na e mes desaroyo akí, anto sigur pa e hóbennan ku tin mesté di atenshon spesial. Pero no ta hubentut so ta na boso kurason mará. Algun di boso ta mira e importansia tambe pa preservá kultura, sindikalismo, kuido na kas i polítika. 

Mi ke animá boso pa sigui ku e bon trabou. Hopi hende ta dependé di boso yudansa, i pa nan boso ta di un balor inkalkulabel. Boso ta hunga un papel supstansial den nos komunidat.

Brevemente mi ke pone den foko e aktividatnan ku boso ta okupá kuné i ku a kondusí na e kondekorashon akí.

Miembro den Órden di Oranje Nassau 

1.Sr. R.S. Bentoera

Masha tempran bo tabata sa ku via polítika bo por ehersé hopi influensia pa duna hendenan di ménos rekurso mas oportunidat. Komo Diputado, i mas ku 40 aña komo miembro di Partido Demokrat, bo a purba siña e hendenan di ménos rekurso kon nan mes por yuda nan kurpa. Esaki tabata e kaminda indiká pa logra progreso sosial. Pero no esaki so. Via deporte tambe bo a dediká bo na e grupo akí. Sea ku futbòl, tènis di mesa òf sòftbòl, e grupo di hende di ménos rekurso pa bo semper tabata di importansia mayó.

2.Sra. M.C. Diwan

Si nos menshoná fábrika di Coca-Cola na Kòrsou, mesora nos ta asosiá esaki ku señora Diwan. 61 aña di servisio no ta ñaña. Masha dia bo a alkansá edat di baha ku penshun, pero bo no konosé ki yama stòp di traha. I no ta bo trabou so ta pegá na bo kurason, e hendenan ku ta traha ku bo tambe. Meresidamente nan ta mira bo komo e figura di mama, pasobra tur hende por yega serka bo tantu pa asuntunan di trabou, komo pa nan asuntu privá. Nan ta asta yama bo ‘mama’. Awor... bo ta un tiki ‘mama’ tambe pa bo radio-oyentenan. Mas di 30 aña bo ta presentá e programa ‘Den kibrá di Mardugá’ ku poesia, prosa i muzik di Kòrsou pa alimentá hende. Pero komo si fuera esei no ta basta, bo ta kla pa yuda misa, hende grandi, hendenan di ménos rekurso den pèrtá. 

3.Sr. S.G. Djaoen

Bo bida ta kompletamente den lus di natashon. E aña akí bo ta kumpli 50 aña aktivo komo instruktor di landamentu i 30 aña komo presidente di ‘Nederlands Antilliaanse Zwembond’. Bo tin tur motibu di ta orguyoso. Pasobra ta via bo hopi mucha, i prinsipalmente muchanan di ménos rekurso a siña landa. Esaki a kontribuí na evitá mas aksidente. Pero bo a ripará tambe ku bo disípulonan tabatin talento i bo a konsiderá nan kapas di por presta na nivel internashonal. Ku tal fin bo a lanta ‘Zwemvereniging Bulado’ i despues ‘Djaoen Swimming Center’. Maske no ta semper tabata fásil, tòg bo a kosechá fruta, pasobra bo disípulonan a logra hopi título internashonal. Pabien!   

4.Sr. J.J. den Hartog

For di aña 2002 bo ta íntimamente ligá ku e klup di tènis na Mundu Nobo. Bo tabata sa bon kon envolví henter e bario, di moda ku e klup por a haña un base hanchu di sosten. Anto esaki no a konta solamente  pa gana e hendenan huntu pa drecha e pistanan di tènis..., bo a duna e hóbennan lès di tènis grátis. Tur djasabra i djamars por a mira muchanan di bario bin hunga tènis. Pa bo ta importante tene e muchanan fo’i kaya, siña nan disiplina i abilidatnan sosial, di moda ku nan por usa esakinan komo palanka pa nan futuro. Un bon ehèmpel ta ku un di bo alumnonan a bira instruktor di tènis i instruktor deportista sertifiká. Bunita trabou!

5.Sr. S. Laker

Nos tur sa ku deporte por tin un influensia positivo riba nos hubentut. I abo, señor Laker, sa esaki ku sertesa. Komo persona ku tabata aktivo den deporte, bo ta dediká bo hopi aña kaba na e deporte di beisbòl na Montaña. Bo ta haña ku muchanan meresé trato igual, ku nan mester por defendé nan kurpa i desaroyá abilidat sosial ku mester sirbi nan pa okupá un lugá digno den komunidat. I esaki ta loke deporte ta proporshoná nan. Bo alumnonan ta representá asta den ‘Little League’ i den ‘Major League’. Un prestashon tremendo i un ‘tarheta di bon impreshon’ pa henter dushi Kòrsou.

6.Sr. F.I. Lourens

Muzik ta kore profundamente den bo sanger. Sea ta bo mes ta kanta, skibi jingle òf komponé tumba, bo ta hasi esaki ku un tremendo dedikashon i ta loke a duna fruta di vários manera. Pero tin algu ku ta sumamente partikular. Bo ta e úniko artista ku por bisa ku 3 aña tras di otro bo komposishonnan a sali ganadó di Festival di Tumba. Fantástiko! Pero no ta muzik so ta pegá na bo kurason. Hende, famia i edukashon tambe ta hunga un ròl importante den bo bida. Bo tin hopi aña ta dediká bo komo eksperto di komunikashon, via e organisashon ‘Nelson i Marelva, Mayor i yu’, na edukashon, enseñansa i formashon di yunan i nan mayornan. Komo tata di famia bo mes, bo sa perfektamente kon importante esaki ta.

7.Sra. Y.J. Pereira.

Mas di 21 aña bo ta dediká na ‘Oudervereniging Totolika’. Bo ta pèrkurá pa semper tur asuntu finansiero ta na òrdu. Ma... no esei so. Bo ta pèrkurá tambe pa semper buska spònser pa e asosiashon. Anto esei ta logra bo semper. Ademas, semper bo ta duna oido na e klientenan di Totolika. Pa hopi hende bo ta manera un mama, kende nan konosé komo ‘Vònchi’. Anto esei no ta na Totolika so, sino tambe na Ayudo Sosial Santa Maria. Bo ta konosí komo un forsa indispensabel kende su kurason ta bati pa su trabou i ta kla pa duna esnan di ménos rekurso un man: via distribushon di pakete di kuminda, aktividatnan pa haña fondo i asta via formashon di e klientenan mediante charla. I e klientenan ta apresiá bo yudansa mashá, pasobra bo ta asta madrina di yu di vários kliente.

Kabayero den Órden di Oranje Nassau

1.Sr. S.J. Heerenveen

Si nos bisa Stanley Heerenveen, nos ta bisa sindikato. Durante mas di 33 aña bo a okupá vários funshon den ABVO i bo a dediká bo na defendé i salbaguardiá posishon hurídiko di ámtenarnan. Komo ámtenar ku penshun, esei ta na bo kurason mará. Pero meskos tambe bo a organisá aktividat sosial pa hende grandi i pa hende siegu, manera evento musikal i bailabel. Anto nos no a papia mes ainda di deporte. Futbòl, vòlibòl, beisbòl. Ademas di a praktiká e deportenan akí bo tabata aktivo tambe komo miembro di direktiva di klup di futbòl ‘SV Jong Holland’. 

2.Sra. G.J.L.M. Faber-Melfor 

Den tur loke bo ta hasi, muchanan ta sentral. I no mucha sin mas, sino muchanan ku tin nesesidat di atenshon spesial. Durante hopi aña bo a dediká bo na enseñansa spesial komo Inspektor. Ku e eksperensia ei bo a ofresé bo servisio tambe na vários fundashon manera ‘Cariiense’, ‘Kinderbescherming Curaçao’, ‘Fukayna’, kaminda kontinuamente desaroyo di e mucha ku nesesidat di atenshon spesial ta e focus. Bo ta desaroyá posibilidatnan edukashonal pa mayor i yu, pero tambe pa otronan ku ta bini den kontakto ku muchanan ku mesté di atenshon spesial. E alkanse ta pues di un enormidat sin igual. Pasobra asta te na New York bo ta ofresé bo servisio via fundashon ‘Liberata Dance Theatre Incorporated’. Ta importante pa bo ku bo ta alkansá tantu hende posibel i esei bo ta hasi via e programa di televishon ‘Solo ta sali pa nos tur’ i den pasado tambe via e programa di radio ‘Konsulta ku Glynis’. Ta siña e muchanan kon desaroyá abilidatnan komunikativo i kon stimulá un imágen positivo di nan mes i sinti konfiansa den nan mes. Hèrmèntnan impresindibel pa ta  eksitoso den bida. Mi ta kita sombré pa bo!

3.Sra. S.A. Olario

Algun hende konosé bo komo ‘mam’ i hopi hende tambe komo ‘kapitein’ òf nan ta yama bo ‘juf’, ‘coach’ òf simplemente ‘Chinka’. Asina tantu nòmber di kariño, mester ta nifiká ku pa hopi hende bo a hunga un papel importante den nan bida. 

Banda di bo profeshon di dosente na Radulphus College bo ta tambe ‘remedial teacher’ i dunadó di konseho. Hopi di e alumnonan ta yega serka bo ku nan problema i semper bo ta duna oido. Ku masha dedikashon bo ta kana un mia èkstra pa bo alumnonan. Pero no ta pa e alumnonan so, komo Kapitein den VKC, bo tin hopi aña kaba ta dediká bo na seguridat di Kòrsou. Bo ta mira den esaki tambe importansia di e kooperashon denter di Reino, en partikular pa loke ta Defensa. Anto nos no a kaba, pasobra ta resultá ku ta sobra tempu ainda pa bo ‘coach’ deportistanan, komo rèfri den e deporte di lucha i organisá tur kos rònt di kompetishon. Hopi hende ta mira bo komo modelo, sigur komo eks-kampeon di ‘kickboxing’. Finalmente, aunke mi ta kuminsá puntra mi mes ta unda bo ta saka tantu tempu asina, bo ta dediká bo komo presidente na e klup di motosiklista na Kòrsou. Mi por bisa trankil ku bo ta un shempié kende ta hasi tur kos ku e debido dedikashon. 

4.Sra. S.A.F. Martis-Treurniet

Danki na bo, kuido na kas ta loke e ta awe na Kòrsou. Hopi aña largu bo a dediká bo via fundashon ‘Wit Gele Kruis’ na profeshonalisá kuido na kas na Kòrsou. Pero tambe komo presidente di vários fundashon, kasnan di kuido i IFE (skol di preparashon pa enfermeronan), ketu bai bo ta aportando pa optimalisá kuido na kas na Kòrsou. Banda di esaki bo tin hopi aña aktivo den Iglesia Katóliko i Renobashon Karismátiko. Komo miembro di ‘National and Carribbean Service Team’ bo tabatin e responsabilidat entre otro pa organisá konferensia importante, aktividat pa rekoudá fondo i dianan di formashon. E kompromiso ku bo ta mustra den tur loke bo ta hasi pa bo próhimo, ta un ehèmpel pa otronan. 

Masha pabien ku boso kondekorashon real.

Mi ta pidi un aplouso kaluroso pa tur nos kondekoradonan!

Promé ku mi gancha e kondekorashonnan mi ta pasa palabra pa mi achüdant, pa e lesa e Dekreto Real.