DISKURSO DI GOBERNADOR

SEÑORA LUCILLE GEORGE-WOUT

PARTIMENTU NA GRANDI DI KONDEKORASHON (‘lintjesregen’)

26 DI APREL 2017

Bon dia tur hende presente,

Ta un honor pa na nòmber di Su Mahestat Rei Willem Alexander mi entregá na un kantidat di boso un kondekorashon real. Na total 10 persona lo risibí un kondekorashon. Ta trata di hende ku na Kòrsou nos  ta orguyoso di nan. 

Dia di partimentu na grandi di kondekorashon (‘lintjesregen’) ta un dia ku semper mi ta anhelá pa yega. Ta un momentu ku komo parti di Reino Ulandes, nos por ta orguyoso di e vínkulo ku komo paisnan nos ta kompartí ku otro. Ademas, ta un momentu ku nos ta reflekshoná riba importansia di trabou boluntario i e impakto ku esaki tin riba nos komunidat. 

Un komunidat no por eksistí sin hende manera boso. Boso kontribushon na komunidat ta di balor inkalkulabel. Boso ta servisial, boso ta konektá hende ku otro, boso ta skucha i boso ta inovativo ku e tiki medionan ku tin biaha boso tin na disposishon. Boso ta presta yudansa, kaminda otronan ta faya di hasi esei.  

Mi ta sigur ku boso dedikashon ta laga un sonrisa riba kara di hopi di e hendenan ku ken boso ta atendé. Nan ta sumamente gradisidu pa tur loke boso ta hasi.  Hopi di boso a dediká boso na desaroyo di nos muchanan, na hubentut i deporte, na enseñansa spesial, na konservashon di kultura i historia, pero tambe na proyektonan via iglesia, na boso propio empresa òf na proyektonan sosial. 

Mi no por kaba di enfatisá sufisientemente kon importante boso aporte ta pa komunidat i aki mi ke bolbe ekspresá mi apresio. I ta p’esei awe boso ta sentro di atenshon. Mi sa ku boso no ta kustumbrá ku esaki, pero disfrutá awe di tur e gabamentu akí. Boso ta meresé! Anto esaki ta opinion di Su Mahestat, nos Rei tambe! 

Mi ke papia kòrtiku pa mustra riba boso aktividatnan partikular, esta loke a kondusí na e kondekorashon akí.  Despues mi ta pasa palabra pa mi achudant ku lo lesa e Dekreto Real, promé ku mi pasa na pega e kondekorashonnan na boso pechu. 

1Sra. R.M. AlbertinaBo tin hopi aña ta dediká bo na Toastmasters. Esaki bo ta hasi ku gran dedikashon. Bo ta konsiderá importante tambe pa deporte risibí e atenshon i  fondonan nesesario via Cur. Sport +Olympische Federatie CSOF, Federashon di  Taekwando i Curaçao Softbal Bond. Ademas, bo dedikashon na hasi pueblo konsiente di importansia i nifikashon di  bandera di Kòrsou, nos eskudo i nos himno ta sumamente apresiá. 

2Sra. M.L. Barry-James Bo kompromiso durante hopi aña ku komunidat Metodista na nos isla ta motibu di mashá apresio. Nada ta di mas pa Sra. Barry-James! Sea pa duna mucha lès i tuma nan den bo kas durante fin di siman, òf bai ku bo kor bai kanta pa enfermonan, òf sostené hende muhé den nan aktividatnan.  Dedikashon di Sra Barry-James no tin límite.  

3Sr. V.D. DaswaniMi por bien yama bo ‘shenpia’. Si bo no ta okupá bo den Rotary ku tur sorto di proyekto boluntario, bo ta sumamente okupá ku tur sorto di funshon den direktiva di ‘Curaçao Indian Business Association’, den CARF (Curacao Animal Rights Foundation), òf Asosiashon di Outismo na Kòrsou. Sino ata bo ta organisá ku ‘British Pub Quiz’ aktividatnan    ku ta produsí hopi plaka pa kualke bon kousa. Ademas, hopi aña largu bo a dediká bo den direktiva di DMO, na desaroyo i seguridat di Punda. Chapeaux!

4Sra. L.P. Henriquez-VillarealMi sa ku bo no gusta ta sentro di atenshon, pero ku bo historial, bo ta meresé realmente pa tur wowo ta riba bo. Tur loke bo a hasi durante e 48 añanan tras di lomba tabata ku e mucha den foko. Komo dosente bo a duna semper un tantu mas, e èkstra mas. Pero dunamentu di lès so no tabata basta pa bo. Bo a organisá tambe tur sorto di otro aktividat pa e muchanan i bo mes a sòru pa rekoudá e fondonan nesesario. Anto si esei no alkansá bo tabata paga ku sèn fo’i bo propio saku. Bo tabata hasi esei tambe den kaso ku e muchanan no tabatin sèn pa akohida despues di skol. Mi ta sigur ku masha mucha a yega basta mas leu den bida, ku bo yudansa. 

5Sr. J. KleijnBetonbouw tabata pa bo no solamente un empresa, sino tambe un famia. Bo a pèrkurá semper bon pa bo trahadónan i prueba di esei ta e apresio ku nan tabatin pa bo. Ma no ta pa nan so bo tabatin atenshon, sino pa hendenan di ménos rekurso den nos komunidat tambe. Bienestar di e famianan ku a bai biba den e kasnan ku bo a traha tambe tabata bo preokupashon. Meskos tambe pa Asosiashon di Mayornan Totolica pa ken bo a traha e sentro pa ‘muchanan ku masha difikultat pa siña’ (ZMLK) ku te dia djawe ta na uso.  Ma tin mas kos. Via Lions Club tambe bo a dediká bo hopi aña na un kantidat di proyekto.

6Sr. C. PalaciosDen bida diario  bo por ta reportero na radio, pero segun mi, bo berdadero pashon ta pa hubentut i deporte. Bo tin hopi aña kaba ta dediká bo na hubentut. Via deporte bo ta eduká nos muchanan mustrando nan riba norma i balor. Bo ta laga nan deskubrí nan kapasidatnan, i di e forma ei, eksplorá

nan oportunidatnan. Esaki bo ta hasi den bario di Brievengat, kaminda for di nada bo a lanta un tim di basketbòl. Meskos bo ta hasi serka Bos di Hubentut via Brigada di Seguridat i Formashon, i ademas serka e tim di futbòl na Kintjan. Bo ta sigui hasi e trabounan akí ku kompleto konvikshon, te asta si bo mester hinka man den bo propio saku pa juda. 

7Sra. R.E.C.N Sintiago-ZimmermanAsina menshoná bo nòmber, hende ta pensa riba Karnaval. Ta hopi aña kaba bo ta dediká bo na Karnaval i su konservashon.  Esaki ta sosodé den “Estreno di Pikete” òf ‘Estreno Mas Pikete’, òf den otro gruponan ku por ta den pèrtá. Bo ta responsabel pa e diseño- i pañanan di e gruponan, pero bo ta coach hóbennan tambe pa asina mantené e fiesta di Karnaval bibu. Bo ta asta asina pashoná ku ora periodo di Karnaval pasa, bo ta kuminsá plania mesora pa e siguiente fiesta di Karnaval. 

8Sr. I.A.J. van DoorenBo bida tin mas ku 30 aña kaba ta drei rònt di deporte di ‘zeil’. Hopi hende ta mira den bo pa ‘zeilsport’ un faktor indispensabel. Sin bo konosementu i bo habilidat zeilsport na Kòrsou lo tabatin totalmente un otro kara. Bo a inventá asta un sistema di ‘handycap’ pa e barkunan di bela, di moda ku kompetensia por tuma lugá di un forma mas honesto. Banda di esei bo ta pone bo mes disponibel boluntariamente tambe na e otro islanan di Reino, pa yuda nan hasi e deporte mas profeshonal. 

9Sra. I.C. DwarkasingPa mas ku 40 aña kaba bo a dediká bo na enseñansa spesial. Bo tabata i ta haña te ainda importante pa e muchanan akí tambe por tuma parti aktivo den nos komunidat. Bo aporte den esaki, ta guia e muchanan den hasimentu di hùiswèrk òf organisá ‘kamp’ pa nan. Bo ta sali na interes di e muchanan  akí asta na  nivel internashonal via ‘Association for Supervision Curriculum Development’. Pero parse ku esaki no ta basta.  Bo ta ademas boluntario den e movementu di muhé SEDA i bo ta yuda otro famianan ku pakete  di paña i kuminda.

10Sr. A.D. van der ReeBo firme konvikshon ta ku historia no mester bai pèrdí. Komo presidente i fundadó di ‘Stichting Battle Station Blaauw Force Curaçao’ bo a pone komo meta, konservashon i maneho di e restunan di Segunda Guera mundial na Kòrsou i ekshibí nan tambe pa públiko.  Bo a yega leu kaba ku bo plannan pa habri un parke na airu liber i un museo tokante Segunda Guera Mundial na Blue Bay. Pero banda di esaki bo ta kompartí bo konosementu tambe ku hóben i adulto via charlanan na skol i via vários organisashon. Tur aña bo ta kooperá ku e konmemorashon i bo tabata tambe ko-fundadó i donatùr di ‘World War 2 expositie Guera na Kòrsou’. 

Awor, despues di e relato impreshonante aki di boso estado di servisio prestá na komunidat, mi ta pidi mi achudant pa e lesa e Dekreto Real.  

Mi ta felisitá boso ku boso Kondekorashon Real i mi ke enkurashá boso pa sigui hasi e bon trabou, i inspirá otronan pa huntu ku boso sigui traha na bienestar di kolektividat di nos pais. 

Un kaluroso aplouso pa nos hendenan ku awe a risibí un kondekorashon meresí!!!