Diskurso di Pasku di Gobernador di Kòrsou, 2016

Estimado Konsiudadanonan,

Pasku! Fiesta di nasementu di Kristu Hesus: nasementu di E yu ku ta duna konfiansa pa futuro na tur hende di bon boluntad. Nos ta preparando pa drenta 2017, un aña ku nos ta bai topa ku masha hopi bon intenshon, speransa i konfiansa.

Konfiansa den futuro i konfiansa di nos un, den otro, ta sumamente importante, pasobra konfiansa ta loke ta tene nos komunidat huntu, konfiansa TA e salbabida riba kua nos sosiedat ta drif. Sin konfiansa ta imposibel pa un sosiedat funshoná, pa no papia mes di su posibilidat di por sigui desaroyá mas aleu. Konfiansa t’e fundeshi di tur komunidat, ke men di esun di nos tambe. Kaminda tin falta di konfiansa, deskonfiansa ta lanta kabes, ta mustra e banda robes di e mesun medaya. Lamentablemente, meskos ku na otro partinan di mundu, falta di konfiansa serka nos siudadanonan tambe i na medida kresiente,  ta klaramente visibel.

Investigashon ku nos Ofisina Sentral di Senso a hasi resientemente, ta mustra ku siudadanonan di Kòrsou mas i mas ta pèrdiendo fe den nos demokrasia. T’asina ku un di entre kuater persona so ta indiká ku nan ta interesá den polítika. Ku esei nos ta nota ku e abismo proverbial entre siudadano i polítika, lamentablemente ta mas grandi ku nunka. Pero e málkontentu akí no ta konta pa polítika so. Nos konfiansa den otro institushonnan manera gobièrnu, prensa, sindikato i asta den nos sistema hudisial tambe ta abou. Preokupante ta ademas, ku e konfiansa entre siudadanonan un ku otro tambe a mengua. Sifranan ta mustra ku ta un di entre tres hende ta konsiderá ku mayoria di hende ta di konfia. Kaminda ántes bo por a sali bai hasi rospondi sin problema, sin nodi di sera bo port’i kas, realidat awendia ta otro. Ku e desaroyonan akí, Kòrsou ta sigui un kurso ku na mas lugá na mundu hende ta mira. E rasonnan pakiko e konfiansa ta bayendo atras, no ta fásil pa definí. Sumamente kla   ta sí, ku hopi di boso ta haña ku por mihó i ku mihó mester por.

Pa por restourá e konfiansa violá, ta di gran importansia pa nos rekonosé kon esei a sosodé. Nos mester evitá ku nos ta sigui bira lomba pa e institushonnan i pa otro. Nos no mester pèrdè nos mes tampoko den negativismo, sino ser mas onesto ku otro, purba generá ekspektativanan realístiko, aktua di forma transparente i kisas nos mester pone mas énfasis riba sentido síviko i riba interes general na lugá di riba desaroyo individual. Huntu nos mester aspirá na mustra sinseridat den nos manera di anda..., den nos motibu- i e metanan ku nos ke logra.

Anto den e esfuerso akí nos no mester mira otro hende so, sino mira nos mes tambe. Ta klaro ku nos institushonnan t’ei pa sirbi komunidat, pero kada siudadano tin enfátikamente su propio responsabilidat ora ta trata di preokupashon pa kuido di nos sosiedat. Konfiansa tin di bini di dos banda. Nos komo siudadano tin di habri nos mes pa aserkamentu di otro hende, mustr’é rèspèt i ofres’é espasio pa komunikashon. Ta piedanan esensial pa pone un fundeshi riba kua por konstruí konfiansa. Ta e ora ei so nos por kambia huntu e rumbo akí i restourá e konfiansa.

Anto sin duda esaki ta konta tambe pa konstrukshon di konfiansa entre paisnan. E vínkulo di tantu tempu ku ta eksistí entre e paisnan di nos Reino, ta unu di ‘ups and downs’. Meskos ku den un matrimonio, kaminda hopi bia nos ta di akuerdo ku otro, pero tin bia nos opinionnan ta diferensiá fuertemente. Meskos ku den un matrimonio, aki tambe ta konta ku... konfiansa, kompromiso i determinashon ta base pa un relashon sano. Ta di importansia ku huntu nos ta sigui invertí i traha riba nos relashon. Ta e ora ei so Reino lo ta mas ku djis un struktura estatal di algun pais. Ta nos enkargo esaki i ta nos deber di kumpli.

Estimado konsiudadanonan,

Trabou tin, pero afortunadamente e investigashonnan ta mustra tambe ku tin hopi desaroyo positivo. Ku tur rason bo ta masha orguyoso di Kòrsou i di nos kultura. Por lo general bo ta satisfecho i gran mayoria di boso ta di opinion ku boso posishon sosial den e añanan benidero ta bai mehorá i boso ta dispuesto na tuma inisiativa pa logra esaki. Bo ta positivo tokante e situashon den kua bo famia ta biba i tokante e bario kaminda bo tin bo kas. Al fin i al kabo bo ta un hende sosialmente komprometí, bo ta partisipá aktivamente den komunidat i bo ta mustra kon dispuesto bo ta... trahando ku dedikashon i sin interes propio na benefisio di gruponan vulnerabel manera mucha pober, desempleado, ansianonan i hendenan ku desabilidat. Tur esaki ta manifestashon di amor pa próhimo i kompashon, loke ta duna speransa i konfiansa den futuro. Un futuro di bo mes, di bo famia, di bo bario, di bo pais i di nos Reino.

Mi ke kaba ku un sita di e eskritor John Maxwell. E ta afirmá: "Hende ta konstruí konfiansa ku otro kada bia ku bo skohe integridat na lugá di imágen, ora bo skohe bèrdat na lugá di kumbiniensia, òf honor na lugá di benefisio personal.”

Ora huntu nos pone e pensamentu akí den práktika aña ku ta bini, mi tin tur konfiansa ku nos ta bai tin un 2017 fantástiko!

Mi ke ripiti: "Hende ta konstruí konfiansa ku otro kada bia ku bo skohe integridat na lugá di imágen, ora bo skohe bèrdat na lugá di kumbiniensia, òf honor na lugá di benefisio personal.”

Tambe na nòmber di mi esposo Herman mi ke deseá boso tur un fiesta di Pasku bendishoná, sperando ku aña nobo lo trese hopi prosperidat, salú i union den pueblo.