Diskurso di Gobernador di Kòrsou 

na okashon di selebrashon di Pasku 2017

Kerido kon-siudadanonan,

Awe ta selebrá Pasku na Kòrsou. Meskos ku kristiannan rònt mundu, kristiannan na Kòrsou tambe ta selebrá awe nasementu diHesukristu. Fiesta di Pasku ta fiesta di lus, di speransa i di alegria. 

Nasementu di Hesus a trese gran alegria pa su mayornan, no opstante e sirkunstansianan humilde ku el a nase aden. No den un palasio, sino den un stal. No lorá den paña di kalidat, sino den paña simpel. No tabatin dignatarionan ta warda den sala di espera, sino wardadónan i nan bestianan. I tòg... historia di e yu akí, nasí bou di sirkunstansianan simpel, hasta deplorabel, tin e mes forsa ku e tabatin mas di dos mil aña pasá. Memoria di su nasementu ta trese alegria i ta brinda speransa. Di pursi nasementu di un inosente ta ketu bai símbolo di speransa pa futuro, kaminda bondat ta vense maldat. 

Fiesta di Pasku kristian no ta e úniko fiesta di lus i alegria ku nos ta selebrá na Kòrsou. Diwali, Hannukah iSuikerfeest, ta fiestanan kaminda ta pone speransa pa futuro i kompartí loke bo tin ku otro...,sentral. E diversidat akí i e libertat pa por biba den diversidat, ta un gran tesoro. Ta algu pa nos tesorá i pasa pa e generashonnan benidero. I ta nèt e generashonnan benidero ta awe nos mayor preokupashon. 

Durante selebrashon di kambio di aña otro siman nos tur lo ta pendiente pa e notisia di e último yu ku a nase na 2017 i e promé yu ku nase na 2018.Sinembargo, banda di e aviso di nan nasementu den un notisia den korant, nos no sa mashá di e sirkunstansianan bou di kua nan a bini na mundu ni tampoko bou di kua sirkunstansia nan lo krese. Nos no sa kiko nan futuro lo ta. Nan futuro ku ta nos futuro.

Nos sa tende asina tantu “ku muchanan ta futuro”... Pero kiko esei ta nifiká presis? Ta nifiká ku nos futuro ta dependé kompletamente di éksito di nos yunan. Anto den esaki kada mucha ta konta. 

Kada yu ta bini na mundu ku nan talentonan, ku nos komo adulto tin e privilegio di yud’é desaroyá.  Pa aportá na esaki ta esensial, ku kada adulto tin bista pa e muchanan den su serkania. Bista pa nos propio yunan, subrina-, ihánan, yunan di kriansa, yunan di bisiña, amigunan di nos yunan na skol. 

Ta nifiká tambe, ku ora nos tin difikultat ku edukashon di nos yunan, nos ta buska yudansa. Òf nos ta aseptá yudansa, asta si nos no a pidi esei. Asta si nos ta pensa ku no tin nodi di tal yudansa. Di pursi no ta trata di nos, sino di bienestar di nos yunan, kendenan ta totalmente dependiente di e adultonan den nan bida. 

Tin bia den tempu di Pasku, hende ta poneselebrashon di fiesta sentral, miéntras ku motibu di e fiesta mes, ta disparsé den background. P’esei ta na kada un di nos, pa no pèrdè fo’i bista e mensahe di fiesta di Pasku. Stima bo próhimo, manera bo mes. 

E palabranan simpel akí ta brasa totalidat di e eksistensia humano kompleho, kompletamente.  Ta un mensahe simpel, pero na mes momento, e kos mas difísil ku bo por pidi un hende hasi. Inherente na hende ta por sierto ku hende ke sobrebibí, e ke gana, subi, haña su kièr. 

Stima otro, ta nifiká sinembargo konfia otro, pordoná, no pone trampa pa otro ni menospresiá otro,  no sinti envidia ora bo mira bo próhimo ta progresá, al kontrario! Ta nifiká ku no ta semper nos ta gana, ni semper nos ta haña nos kièr. Ta nifiká ku nos ta skucha otro, loke ta konta na eskala chikitu den famia, pero sigur tambe na eskala mas grandi,na trabou òf en general den komunidat. 

Skucha bo mes tambe ta masha importante. Esaki ta pone bo biba konsiente, loke ta kondusí na kresementu, na progreso. Skucha otro, ta kondusí na haña un mihó bista riba kualke situashon i na haña komprenshon pa opinion di otro hende. Sin ta konsiente di bo mes i sin tin komprenshon pa otro hende, ta bira masha difísil pa bo stima un otro hende mes tantu ku bo ta stima bo mes. 

Si nos komo adulto por biba e balornan akí den nos bida diario, nos yunan den tur nan inosensia lo risibí e ehèmpel ku nan meresé. 

Si realmente nos tin Kòrsou nos patria na pechu, ban -kada un di nos-  kòrda riba e mensahe sentral di e fiesta di Pasku i propag’é. Stima bo próhimo, manera bo mes. Asina...  (na un moda di papia moderno) nos ta logra huntuun situashon di ‘win-win’, esta benefisioso pa tur hende i nos ta konstruí huntu futuro di nos pais. 

Tambe di parti di mi esposo Herman, mi ta deseá tur hende un Pasku di bendishon, ku e speransa ku Aña Nobo lo trese prosperidat, salú i harmonia pa un i tur.

Bon Pasku!