DISKURSO DI GOBERNADOR DI KÒRSOU SRA. L.A. GEORGE-WOUT NA RESEPSHON DI DIA DI REI 

26 di APREL 2019

Ekselensianan, damas i kabayeros bon nochi.

Un sinsero bon biní na boso tur riba e bunita anochi akí. Semper ta dushi nota ku na un kantidat asina grandi boso ta aseptá mi invitashon. Riba nochinan manera esaki mi ta gusta usa e oportunidat pa trata un sierto tema òf asuntu. Sin embargo e aña akí m’a haña esei fèrfelu. No tantu e kuestion di disidí kua tema, sino mas bien pasobra den nos komunidat e tópiko ta asina kargá. Aki algu mas ku un luna nos ta kòrda ku 50 aña pasá e susesonan di 30 di mei a tuma lugá. E dia históriko akí, ku hopi di nos a eksperensiá konsientemente, a laga un impreshon imborabel serka nos tur. Maske awe ya ta kasi mitar siglo a pasa, loke a sosodé dia 30 di mei ta sigui tin su efekto te dia djawe i e tabatin un impakto enorme riba nos poblashon. No ta pòrnada ku te dia djawe ainda ta papia i ta diskutí riba loke eksaktamente a pasa. Mi no ke papia awor akí tokante e susesonan di e dia ei mes, awa na suela nos no por rekohé..., ta klabu pasá. Loke sí ta intrigá mi ta e lèsnan ku nos lo por a siña di 30 di mei. Kiko nos a siña realmente di e dia ei? Nos a siña algu i for di e tempu ei nos a krese komo pueblo? Konsiderando e diferente puntonan di bista riba e problema, no ta fásil duna kontesta kla riba tal pregunta. E lès mas importante ku mi mes a siña ta ku violensia nunka no ta e solushon; ni di parti di e siudadania, ni tampoko di parti di esnan na kabes di pais. Violensia ta polarisá sosiedat i ta pèrkurá pa hende krese mas separá fo’i otro na lugá di yega mas serka otro. Por lo tanto, no mester resolvé e diferensianan di opinion riba barikada, sino na mesa. Ta manteniendo kombersashon i kondusiendo debate ku rèspèt pa e puntonan di bista i interesnan ku ta diferensiá, por trese e diferensianan di opinion mas serka otro. Ta loke mester hasi den tempu di prosperidat, pero masha sigur tambe den tempu ku bientu ta kontrali. 

I asina mi ta yega na e retonan ku nos ta enfrentá aktualmente. Mi ta papia di ‘nos’ konsientemente, pasobra mi no ta referí na gobièrnu so, na empresa- i institushonnan so, sino tambe na nos tur. Nos tin algun tempu kaba ta eksperimentá ku nos situashon finansiero-ekonómiko i sosial ta bayendo atras i final ainda no ta na bista. Nos tin algun tempu kaba ku oumento di desempleo, medidanan di ousteridat menasante, inseguridat tokante refineria; pais i pueblo ku ta sufriendo bou di sirkunstansianan pa kua parsialmente so nan mes ta responsabel. Turismo ta e sektor ku nos mester tesorá awor ku ta parse ku e ta evadiendo e krísis ekonómiko. No por laga disturbionan den nos pais afekt’é. Den e tempunan difísil akí nos mester ta konsiente ku populismo i sintimentunan di intoleransia por surgi. Nos no por laga esaki tuma lugá i nos no mag di laga esaki tuma lugá. Ta na nos tur pa resistí esaki manteniendo nos uní i mustrando rèspèt pa vishon diferente.  Pero nos mester keda mira nos mes tambe krítikamente i puntra nos mes si nos ta hasiendo loke ta korekto. Ta asina ku siudadanonan ta haña oportunidat igual? Ta repartí e benefisionan sosial honestamente? E siudadano ta sinti ku ta trat’é di forma hustu? Mi ta kere firmemente ku si nos sigui hasi esaki, nos lo no soportá huntu e tormenta akí so, sino ku huntu nos lo sali mas fuerte for di e trafat. 

Señora i señores,

Un bunita tradishon di dia di Rei ta ku no ta dia di aña di nos Rei Willem-Alexander so nos ta selebrá, sino ku nos ta usa e momento tambe pa reflekshoná eksplísitamente riba un grupo di persona spesial kendenan a traha pa nos sosiedat di manera desinteresá i durante hopi aña. E áreanan na kua nan a dediká nan ta diverso, pero semper esensial. Ya sea nan ta apoyá esnan ménos afortuná, kontribuí na preservashon di nos kultura òf nan ta dediká nan na deporte, nan tur ta meresé nos gran rekonosementu. Awe nan ta risibí rekonosementu públiko eksplísito, pero naturalmente nan meresé esaki henter aña i semper! 

Awe mainta tabata mi plaser anunsiá 14 kurasoleño fantástiko ku a honra nan ku un premio otorgá pa su Mahestat. Kasi tur e tòpernan akí ta presente awe nochi i mi ke bolbe felisitá nan sinseramente ku nan distinshon i gradisí nan pa nan esfuerso sin frena durante e último añanan! 

Mi ke bati glas huntu ku boso awor i brinda pa salú di Su Mahestat Rei i pa e méritonan di nos dekoradonan. 

Biba Rei!!!!