ISKURSO DI GOBERNADOR DI KÒRSOU 

SEÑORA LUCILLE GEORGE-WOUT

SINTA NA KANTIDAT

DIA 26 DI APREL 2019

 D

Bon dia tur hende presente, i partikularmente nos dekoradonan, 

Awe ta un dia grandi i spesial atrobe. Un dia pa nos reflekshoná i rekonosé tur e hendenan komprometí ku nos sosiedat ku di forma boluntario i ku pleno dedikashon ta traha pa e komunidat akí. P’esei mes tambe ta un honor pa na nòmber di Su Mahestat Rei mi por otorgá boso un Kondekorashon Real. Na tur, ta 14 persona, di kua dos no por ta presente awé, lo risibí kondekorashon. Ta un distinshon ku kada un di boso realmente meresé! Pasobra un sosiedat no por sin hende manera boso. 

Mas i mas ta notabel kon duru kurason di hendenan den nos komunidat ta bira. Duru den e sentido ku kada ken ta pa su mes, sin ta paga muchu tinu na su próhimo den nesesidat. Afortunadamente den boso kaso esei ta otro! 

E tendensia egoista akí ta kana samsam ku e normanan ku a blikia. Mi ta di opinion ku nos mester kibra e tendensia akí i regresá na loke ta nos base, kaminda ta importante pa ta ehèmpel i duna bon ehèmpel. Karakterístikanan esensial manera integridat, hustisia i miserikòrdia mester bolbe bin destaká. Pasobra ta parse ku hopi hende a pèrdè e balornan akí for di bista. Anto ku esei mi ke men ku mas i mas hende ta di opinion ku nan por eksigí sierto kos, pasobra nan ta konsiderá ku esei ta nan derecho. Por sierto hopi bia no ta masha kla di unda e derecho ei ta bini. P’esei lo mi tin gana di mira ku hende ta bai dediká nan di un forma modesto na sirbi na lugá di eksigí. Un kambio asina ta benefisioso pa henter komunidat. Ta di mashá importansia pa huntu nos progresá komo hende i no laga progreso pa djis un grupo selekto so. 

Ku boso esfuerso boso ta okupá diariamente ku yuda hende pa nan bai dilanti. Boso ta keda den e ròl di sirbidó na bienestar di boso próhimo, tin bia asta a kosto di boso propio interes. Nada malu ku esei, pasobra komo sosiedat nos mester hasi sakrifisio bai i bini, pa nos yega atrobe na esensia di eksistensia humano. Ku debido orguyo Kòrsou por bisa ku boso manera di ser i boso dedikashon na boso semehante ta bon pa nos pais. Boso ta duna ehèmpel kon mester anda, sea ta den deporte, den misa, den bo bario òf den arte. Tur esakinan ta tereno ku ta konektá hende ku otro i kaminda hende tin mesté di otro. 

Lo mi ke animá boso pa sigui ku boso trabou i sigui marka pouta di dunadó di bon ehèmpel. Ta duna otro hende speransa, i... mi tambe. Hopi hende ta dependé di boso kontribushon i di boso yudansa. Pa nan, boso ta di balor inkalkulabel. Boso tin un ròl masha importante den nos sosiedat i mi ta spera sinseramente ku boso lo por sigui desempeñá e ròl akí pa hopi aña mas. 

Mi ke konsiderá kòrtiku asina boso aktividatnan spesial, ku ta loke a kondusí na e distinshon akí. 

Miembro den Órden di Oranje Nassau

1 Sra. M.E. Mathew-Barry Komo miembro aktivo di iglesia Ebenezer bo a okupá un lista di funshon masha largu i impreshonante. Di sekretario i rekoudadó di fondo, te presidente di ‘Ebenezer Women’s Group’. Bo ta semper kla pa sirbi bo próhimo. Niun pregunta, niun petishon no ta demasiado pa bo. Semper lo bo mira kon ta hasi pa bini kla. Bisa nò, no ta bo banda mas fuerte. Via ‘Miss Lee Foundation’ bo ta yuda mucha i adulto mediante kurso, pa nan desaroyá nan kualidatnan sosial i personal. Pero no ta via iglesia so..., tambe via ‘Health Care Toastmaster Club’ i ‘Female Jaycees Curaçao’ bo ta purba yuda e miembronan den desaroyo di nan kualidatnan personal i komo lider. Pa tal dedikashon a nombrá bo asta Senador di ‘Jaycees International’.

2. Sr. E.C.F. Bertad Despues di tabata 40 aña aktivo den enseñansa, bo ta guia hóbennan tambe komo coach, den sòfbòl i den futbòl di sala. Bo a sa di logra asta 7 kampionato tras di otro. Pero no ta hóbennan so a hòrta bo kurason. Bo tin 21 aña ta dediká bo na bo bario Willibrodus, komo presidente di sentro di bario. Bo a lucha tambe pa playa di Daaibooi keda libremente aksesibel i ku éksito! I komo si fuera no ta basta, bo tabata aktivo den polítika i bo tabata 10 aña miembro di direktiva di PNP. 

3 Sr. O.F. Cuales Señor Cuales, asina menshoná bo nòmber, mesora Curom ta bini na mente. Bo tin mas di 45 aña enkargá ku programa di radio i bo ta duna reportahe di tópiko- i temanan diverso. Prinsipalmente bo narashon deportivo a duna deporte un otro dimenshon. E estilo ku bo a nara beisbòl a hasi e deporte akí mashá popular serka hóbennan. Hende a yega na mira deporte ku henteramente un otro bista. I narando na papiamentu bo a tene e leng’akí bibu i den desaroyo. Banda di e narashon i papiamentu ku tin bo interes, b’a dediká bo tambe hopi aña pa mantené e tradishon di Karnaval i Kultura di Kòrsou en general. Den e kuadro ei tambe bo a okupá vários kargo ehekutivo. 

4 Sra. M.A. Esclodina Banda di bo trabou komo dosente den enseñansa spesial, bo ta dediká hopi tempu na religion i iglesia. Bo ta un forsa indispensabel na parokia di ‘Christus de Goede Herder’. Bo ta enkargá spesialmente ku duna guia religioso na mucha- i hóbennan i partikularmente hóbennan ku kapasidat limitá pa siña. Bo ta yuda ku atministrashon di Parokia i bo ta dediká bo na hendenan den nesesidat. Esaki bo ta hasi ofresiendo nan yudansa finansiero, pero tambe kolektando nesesidat di tur dia. Ta un dedikashon inkansabel ku bo ambiente no a laga di nota. 

5 Sra. A.M.P. Jessurun.

“Señora Jessurun awe ta strobá i lo e risibí su Kondekorashon Real na un otro okashon.” Komo persona kende a tuma e inisiativa i komo fundadó di Arte di Palabra, b’a stimulá amor pa Kultura di Kòrsou i pa papiamentu i pone esaki sentral serka hóbennan. Asta Aruba i Boneiru, inspirá pa bo, tin nan propio Arte di Palabra i ta tene kompetensia entre e islanan ABC. Tur esaki a meresé korona tambe, pasobra Arte di Palabra a risibí vários premio, manera por ehèmpel 

Premio Internashonal pa Lenga Materno, Stanley Lamp Award i Premio Biennal Pierre Lauffer, Chapi di plata. Banda di Arte di Palabra bo ta tene papiamentu bibu, skibiendo pa enseñansa buki na papiamentu bo mes. Te dia djawe ainda ta hasi hopi uso di esakinan. Danki pa e kontribushon akí! Anto, no ta skibimentu di buki pa enseñansa so tabata importante pa bo. Guia e alumnonan tabata nifiká ainda muchu mas. Den bo funshon di konrektor bo studiantenan semper por a yega serka bo i haña oido. 

6 Sra. S.E. Nisbeth-Larmonie

“Señora Nisbeth-Larmonie awe ta strobá i lo e risibí su Kondekorashon Real na un otro okashon.” E pashon ku ta bibu den bo ta manera ‘Sanger ta sarafina... si e no por kana, e ta gatia.’ No opstante bo edat, bo ta keda dediká bo na desaroyo di kanto i na dirigí vários kor, manera ‘Bach Koor Curaçao’, kor ‘Orfeon Crescendo’ i e kor ‘Forti Kantando’. Banda di duna lès den formashon musikal tantu na adulto komo na mucha den sentronan di bario, bo a okupá tambe funshonnan ehekutivo pa kor di ‘Sta. Rosa de Lima’ i pa ‘Stichting Educatie Dirigenten en Koristen Kanta den Tono ku Amor i Alma’. Hopi aña largu bo tabata e forsa propulsor tras di organisá kurso di kanto koral i di dirigente koral. Danki pa loke bo a nifiká pa muzik na Kòrsou, i ta nifiká te ainda! 

7 Sra. E.F. Martis-Leito Konvensí ku edukashon i desaroyo ta yabi pa futuro, b’a dediká bo na bo próhimo hopi aña largu via enseñansa i iglesia. Komo un hende ku tabatin un hubentut difísil e mes, bo por komprendé hende den difikultat bon i tabata bo plaser saka un man pa yuda nan. Via enseñansa, banda di duna lès, bo a yuda tambe desaroyá pa skol vários material na papiamentu.

Resientemente b’a publiká asta un outobiografia titulá ‘Ami ta Judith’. Bo tabata semper dispuesto pa yuda alumnonan ku nan spreekbeurt, opstel i resitashon. Di pursi pa bo, enseñansa ta yabi pa futuro. Te dia djawe ainda bo ta aktivo den bo komunidat di iglesia. Bo ta duna guia na adulto pa prepará nan pa e sakramentonan, bo ta tene charla i duna lès di katisashi. Tur esaki bo ta hasi pa motivá hende ku nunka nos no mester entregá. 

8 Sr. N.D. Martina Komo lider spiritual di ‘Prison Fellowship Curaçao’ bo ta nifiká asina tantu pa èks detenidonan i nan famia... No solamente bo ta guia nan pa nan keda riba bon kaminda, bo ta yuda nan tambe finansieramente i materialmente. Anto bo ta hasi esaki for di bo mes saku. Asta bo a tuma famia di un detenido 3 aña den bo kas. Ainda, komo kapelan/kuidadó religioso na prizòn, bo ta keda dediká bo na e detenidonan i via Brasami, na otro hendenan ku mesté di yudansa. Kaminda hopi hende ta pèrdè speransa den detenidonan, abo t’ei semper ku bo positivismo pa yuda e hendenan akí pasa den tempu difísil. 

9 Sr. R.B. Pereira Señor Pereira, amor pa mucha i deporte ta den bo sanger. Ademas di a dediká bo durante hopi aña na bienestar di ’bo muchanan’, bo a lucha tambe via sòfbòl pa e kousa ei. Bo mes a funda ‘Liga Uni Tur’, pa duna hóbennan oportunidat pa praktiká deporte. Despues ku b’a funda e Liga i bo tabata presidente, b’a okupá mas funshon ehekutivo den sòfbòl, manera tesorero na ‘Sport Vereniging Pichingolo’ i sekretario di ‘Curaçaose Softbal Bond’. B’a sigui un kurso komo rèfri, di moda ku bo por a flùit wega di sòfbòl tambe. I ora bo no ta na niun di e puestonan akí bo ta riba vèlt ta coach, òf ta hasi mantenshon na kualke kos nesesario di e vèltnan. Bo amor pa mucha i pa deporte ta bai leu i tur hende a nota esei debidamente. Masha hende ta gradisidu pa bo aporte i te ainda nan ta piki fruta di esei. 

10 Sra. L.E. Sampson Mas di 22 aña bo ta lider di e grupo hubenil ‘The New Generation Group’ di Iglesia Ebenezer. Bo ta sostené hóbennan di edat di 12 te 20 aña den formashon di nan desaroyo personal i sosial. I bo ta hasi méskos tambe pa e muchanan di ménos rekurso den Oranjestraat i e bario Nieuw Nederland, ku ta forma e grupo hubenil ‘Watermelon Group’ denter di Iglesia Ebenezer, e iglesia pa kua bo ta okupá mas ku un funshon so, manera miembro di ‘Wijkkerkenraad’, miembro di ‘Centrale Kerkenraad’ di VPG, i sekretario di ‘Miss Lee Foundation’. E fundashon akí ta ofresé kurso pa promové desaroyo personal i sosial. Bo ta semper dispuesto pa yuda, sin ta ferwagt nada a kambio. 

Kabayero den Órden di Oranje Nassau

1 Sr. J. A. Boutmy Bo a pone e deporte di esgrima na Kòrsou riba mapa, komo deportista i komo rèfri. Bo tabata un guru deportivo pa ekselensia. Banda di praktikadó di e deporte akí bo a okupá vários funshon ehekutivo, manera na klup di futbòl ‘Bandelino’ i na ‘Panamerikaanse Olympiërs Associatie’. Bo ta ko-fundadó di ‘Olympiërs Associatie van de Nederlandse Antillen’ i di e museo di deporte. Te awe ainda nos ta piki fruta di e aportenan akí. Bo ta tambe e hende ku a tuma e inisiativa pa na Hato bini un monumento dediká na Deporte ku na bo opinion no por a falta. 

2 Sr. R.E. Colastica Bo ta di gran nifikashon pa desaroyo di religion katóliko na Kòrsou. For di 1978 bo ta presidente di e fundashon ‘Hóben e piedra bibu’. Ta un fundashon ku ta sostené hóbennan den nan desaroyo religioso i personal. Esei ta varia di organisá konferensia i kurso, te presentá programa di televishon. Ademas, via direktiva di ‘Stichting Rooms Katholiek Schoolbestuur’ bo ta dediká bo na enseñansa. No ta religion so tin bo interes. Nos no por laga di menshoná bo dedikashon na ansianonan via ‘Fundashon Nos Welita’ i tambe via ‘Raad voor Milieu Hygiëne’, na medio ambiente. Abo a pèrkurá pa e ansianonan a haña un kas nobo i ku a desaroyá un maneho riba tereno di medio ambiente. 

3 Sr. F.B.M. Kunneman Bo tabatin un ròl di importansia den desaroyo atministrativo na 10-10-10. Promé komo visepresidente di Raad van Advies, pero despues tambe komo consultant. 

Bo a sa di trese partidonan na tur dos banda di oséano huntu. Ta manera bo tabata logra esaki semper ku e fleksibilidat nesesario. Último añanan bo ta dediká bo na hasi komunidat mas konsiente di e reglanan di ‘corporate governance’ via skibimentu den korant, pero tambe ku kátedra na Universidat i dunando kurso gratuito. Komo abogado tambe bo a hasi esfuerso via e vários posishonnan ku bo a okupá, pa yuda mehorá aplikashon di lei den teoria i den práktika. Un rekòrt remarkabel.

4 Sr. A.A. Ramirez Bo tin mas di 25 aña presidente di ‘Rode Kruis Curaçao’! Bou di bo presidensia bo a pèrkurá pa Rode Kruis a haña un edifisio nobo. Bo a sòru ademas pa funda un sentro médiko na Barber, pero tambe ku transporte di ambulans a haña loke tabata nesesario pa un servisio adekuá. Bo a dediká bo ademas pa boluntarionan risibí preparashon adishonal i pa Rode Kruis na e diferente islanan a bai kooperá mas ku otro i ku otro organisashonnan relevante. I e dedikashon ei a duna fruta na ora di vários desaster di naturalesa ku Karibe a konosé. Na 2013 a koroná Rode Kruis ku e distinshon ‘Appeltje van Oranje’ pa e sekshon di boluntarionan hubenil. Anto tur e kosnan akí bo a hasi boluntariamente banda di bo propio konsultorio di okulista ku ta konta ku hopi kliente. Danki pa bo dedikashon. 

Mi ta felisitá boso tur ku boso Kondekorashon Real bon meresí.

Un tremendo aplouso pa nos dekoradonan! 

Promé ku efektivamente mi otorgá e dekorashonnan, mi ta pasa palabra pa mi achudant kende lo lesa e Dekreto Real.