Diskurso di Gobernador di Kòrsou na okashon di resepshon di aña nobo djárason dia 3 di yanüari di 2019

Ekselensianan, apresiado siudadanonan, bon nochi.

Mi ta kontentu di por saludá boso tur awe nochi atrobe, akí den hardin di palasio di Gobernador di Kòrsou. 

Den masha sentido 2018 no tabata un aña fásil i 2019 tambe, manera situashon ta pinta lo ta un aña kompañá ku hopi reto. E desafionan akí sin duda lo eksigí lo nesesario di gobernashon, di industria i komèrsio, di sindikalismo, pero tambe di abo, siudadano. Den sierto sentido lo por kalifiká 2019 komo e aña di kambio. Nos lo ta kapas na 2019 pa laga Kòrsou bolbe floresé pa tur hende? 

Damas i kabayeros,

Aña ku a pasa tabata un aña difísil pa Kòrsou. Meskos ku e añanan promé, na 2018 a bolbe papia di kontrakshon ekonómiko. For di 2016 Kòrsou ta den un reseshon i hopi empresa, organisashonnan sosial i siudadanonan ta pasando trabou pa tene kabes riba awa. Afortunadamente mayoria di bia esaki ta logra tambe, pero ku demasiado frekuensia nos ta lesa notisia di hotèlnan ku mester sera, tokante kantidat di retiru di personal òf tokante empresanan ku ta bai fayit. 

Pa gobernashon di nos pais tambe tabata un aña difísil. Sigur pa estado di finansa públiko. Debe di gobièrnu a bai oumentando segun añanan a pasa. No solamente den término apsoluto, sino tambe den porsentahe di e produkto interno bruto di pais. 

Tur hende lo ta di akuerdo ku e tendensia negativo akí no ta algu ku nos por keda soportá años i años mas. Nos tur por a tuma nota di e preokupashon ku Cft tin den e konteksto akí. 

E situashon finansiero ekonómiko aktual ta afektá nos tur. Pèrdida di forsa di kompra, òf pió ainda, pèrdida di un entrada, ta un peso pisá riba lomba di siudadanonan òf famianan ku ta pasando den e sirkunstansia akí, pero tambe, peso riba nos poblashon komo totalidat. Pa un kantidat di siudadano e peso ta di tal magnitut ku nan ta bai buska un mihó bida fo’i Kòrsou. Na 2018, pa promé be den 15 aña por a nota un superávit migratorio den nos pais. Ta nifiká ku aña pasá pa promé be den un tempu largu mas hende a sali, ku hende a bin establesé na Kòrsou. Na mi opinion esaki ta típiko di e situashon ku nos t’aden.

Damas i kabayeros,

Yu di Kòrsou ta hende elástiko i fuerte. Ta loke atraves di siglonan nos a proba kaba. Pero pa fuerte ku un hende ta..., den tempu di krísis e tin nesesidat di tin perspektiva, di tin un bista riba yegada di mihó tempu. Pero ki ta e motibu ku progreso na Kòrsou ta stanka? Pakiko den e añanan ku a pasa a bai nos den sentido finansiero, ekonómiko i sosial mas bien malu, i no mihó? Lamentablemente no tin un kontesta klá riba e pregunta akí. Di mes e desaroyonan na Venezuela a kontribuí, pero esaki sigur no ta loke ta splika orígen di tur nos problemanan 

…….

Den nos propio pais nos mester kambia rumbo di e baimentu atras akí. Nos mester keda puntra nos mes si efektivamente nos ta hasiendo e kosnan korekto i si nos ta hasi esakinan manera mester ta. Nos ta usando semper nos rekursonan limitá di e forma mas efektivo i efisiente posibel?

Damas i kabayeros,

M’a kaba di mustra awor ei, ku den tempunan difísil pueblo tin mesté di perspektiva. I nos poblashon tambe tin nesesidat di mira lus na final di e tùnel pa e sigui kere den tempunan mihó. Ta ora nos mira e oportunidatnan, nos por ta prepará pa pone nos skouder bou di nan i trese mehoransa. Ta ku satisfakshon mi ta mira antó kresementu di turismo i gosa di mira mas barku krusero den nos haf i kurason di nos siudat rebosante di turista. Sinseramente mi ta yama invershonistanan grandi, nobo, internashonal den turismo i den trahamentu di barku bon biní. Den e desaroyonan positivo akí mi ta mira e promé señalnan di rekuperashon ekonómiko. 

Alabes nos no por laga di tene na kuenta e retonan enorme ku Kòrsou ta konfrontando. Di kurason mi ta spera ku na 2019 ta kaba rònt af algun proyekto den desaroyo. Lo ta bon ora Hòspital Nobo efektivamente bira operashonal, ora bini seguridat rònt di eksplotashon di refineria, ku porfin ta kibra e problemátika di ‘red tape’, di moda ku tumamentu di desishon tokante proyektonan por kana aselerá. 

Gobièrnu, huntu ku mundu di negoshi ta trahando bela yen pa krea e malchi pa kresementu ekonómiko i prosperidat. E plannan t’ei kaba i ta trahando diligentemente riba ehekushon di esakinan. 

Mi ta kontentu di konstatá ku gobiernu ta hasi uso tambe di e posibilidatnan ku Reino ta ofresé nos. Organisashon di e próksimo mishon komersial ‘bon biní for business’, kaminda gobièrnunan di Hulanda i di Kòrsou konhuntamente ta purba interesá empresanan pa bin invertí na Kòrsou, ta un ehèmpel di kooperashon efektivo. 

Damas i kabayeros,

2019 ta bai bira un aña di reto, pero mi ta konvensí ku ora gobernashon, komèrsio i pueblo en general traha man na man, e momentonan bunita i eksitoso lo predominá eksplísitamente. Huntu nos por hasi e aña nobo akí un bunita aña!

Ta mi plaser pa huntu nos brinda. Huntu ku mi esposo Herman mi ta deseá kada un di boso i boso famia un aña nobo próspero i salú! 

Salú!

Proost!

Cheers!